NUDÉ GHERDËINA

L club Nudé Gherdëina nasc tl ann 2006 y conta atualmënter ca. 350 cumëmbri y cumëmbres atives che se alenea regularmënter o fej pert de cursc de nudé.
L ubietif dl club ie chël de sustenì l sport dl nudé te Gherdëina y ti paejes cunfinënc.
L'atività dl club vën fata tla nudadoia "Mar Dolomit" a Urtijëi/Sureghes/Gherdëina. La nudadoia vën vijiteda nia me dala jënt dl post, ma ie n pont de ancunteda per n gran numer de turisć ntan dut l ann.

Rengraziamënt

do trëi ani fina nosc mandat tl cumité. Ulon Ve rengrazië de cuer per la crëta che nes ëis dat, per vosc sustëni, per la bona cunlaurazion y per la truepa minonghes positives che on giapà.

Ti ultimi ani on for cialà de fé nosta ncëria cun gran sentimënt de respunsabltà, cuscienza y truepa pascion.
Nosc fin prinzipel ie for stat chël de mëter tl zënter l bënsté dla mutans y di mutons y n svilup positif de nosta lia. Pudon ncuei sëurandé la lia cun la cuscienza chieta, te n stat sann y scialdi sterch, sibe dal pont de ududa finanziel che nce de urganisazion.

Ne se assan mei nmaginà che nosc percurs deberieda te cunsëi finëssa nsci. Perchël nes desplejel dassënn.

N lunesc, ai 06/07/2026, ntan la generela straordinera di cumëmbri, ie l cunsëi da śën unì tëut demez ufizialmënter da si ncëries y l ie unì lità n cunsëi nuef, che sëurantol da chësc mumënt inant la respunsabltà de manejé la lia te duc si ciamps.

Ti mbincion a duta la mutans y i mutons de se devertì inant a nudé y de avëi mo truepa de bela esperienzes tla lia.

De gra de cuer per l tëmp spartì y ve mbincion dut l bon!
Cun de biei saluc sportifs,
Ines, Marlis, Claudia, Michela y Lorena